ប្រេសិតពិសេសប្រធានអាស៊ាន លោក ប្រាក់ សុខុន គ្រោងធ្វើទស្សនកិច្ចទៅមីយ៉ាន់ម៉ានៅពាក់កណ្ដាលខែក្រោយ
ភ្នំពេញ៖ ប្រេសិតពិសេសប្រធានអាស៊ាន លោក ប្រាក់ សុខុន គ្រោងធ្វើទស្សនកិច្ចជាផ្លូវការលើកដំបូងទៅកាន់ប្រទេសមីយ៉ាន់ម៉ាដើម្បីជួបភាគីពាក់ព័ន្ធនៃជម្លោះប្រទេសនេះនៅពាក់កណ្ដាលខែមីនា ឆ្នាំ២០២២ ខាងមុខ។
ថ្លែងក្នុងសន្នីសិទសារព័ត៌មានបន្ទាប់ពីកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅរសៀលនេះ លោក ប្រាក់ សុខុន ឱ្យដឹងថា ក្នុងដំណើរទស្សនកិច្ចរបស់លោកទៅមីយ៉ាន់ម៉ានៅខែក្រោយ នឹងជួបពិភាក្សាជាមួយរដ្ឋាភិបាលយោធាមីយ៉ាន់ម៉ា និងសមាជិកក្រុមប្រឆាំងនឹងរដ្ឋាភិបាលយោធានេះ។ លោកបន្ថែមថា ក្នុងដំណើរទស្សនកិច្ចនេះលោកក៏នឹងចូលរួមចែកអំណោយមនុស្សធម៌អាស៊ាននៅមីយ៉ាន់ម៉ាក្នុងមន្ទីរពេទ្យមួយផងដែរ។
លោកថា៖ «ក្រុមការងារលេខាធិការអាស៊ានពេលណាយើងរៀបចំស្រួលបួលហើយ យើងនឹងយកទៅពិគ្រោះយោបល់ជាមួយរដ្ឋាភិបាលក្រុងណៃពិដោដើម្បីពិភាក្សារៀបចំ ព្រោះយើងមិនអាចទៅឆ្កុយនោះទេព្រោះប្រទេសគេមានអធិបតេយ្យដែរ»។
